abo mazen
فريق الإشراف العام
الجنس : 
المشاركات : 2200
 | | موضوع: تابع مختارات من الشعر العراقي 7 6/1/2010, 7:51 pm | |
| – أيام المزبَّن
دِكَ راسك ، ابكَاع العرس
واصعد مراجف للدف
أيام المزبَّن كضن
تكَضن يا ايام اللف .
هيلك صلف . كلّش صلف
تلني وِلحس بِعراني
أشحرّك يا ابو عكَال الترف
دكَ غفوتي ووعاني
من ازمان شوك مياسمي
وما مِش نده بغدراني
وانت عل أخضر بايع العشره
شَكَلّّك . تاني ؟
دِكَ مَتنك ابحجل العرس
وانكَز نكَزتك للدف
الدنيه غرشه ، وهم تِتن
وتدور بينا ونلتف .
يا اسمر . اشكثر اتغرنكَت
يلما شفت مثلك وِنس .
ابعد يّبعد امحبتي
انوجي عله غروب الشمس
خَل نوصل إلفيّة كَصب
واذبحلك أميّة النفس
سِتري بعكَالك يا ترف معكَود
وفَلته بمي العرس
دكَ سترك بستر العرس
وبضحكتك حَنّي الدف
عطشانه , وأنت أُميّتك
ما توكَف بحنّة جف .
حته الكَصب شَب ابعِكَد
بوسه تشِب من بوسه
حِسها شدهني
وخاف كَلبي
ولذت بالجاموسه
جا هاذي عملات العشكَ
كَلبي ، وأكَلك دوسه
موش انته صوجك يا شهم
كَلبي وكَع ناموسه .
دِكَ راسك ابكَاع العرس
واصعد امراجف للدف
أيام المزبَّن كَضن
تَكَضن يا ايام اللف .
هّدِّل رموشك
هَدّل اعله الروح
لَمّن تروَه
يمعذب ظنوني
ذراني الشوك
وانت بذروه
خي لا تعذب الروح
يا مدلول سَوه أمره
كلفه أكَلك
تذبح الزردوم
حَبة الخُوه .
خنر وجفية غوه
وكل كَذله ريحانة طَف
جني مشيت لدخلتي
ويدفعني رمشك لو رَف
ابياهي أعاتب ؟
شو بحت روحي
وكَضت توميلك
طرزت روحي
بريسم أشكَر
يا ترف ، بشليلك
كون آنه مُهرتك
كل العمر واحجيلك
جم دوب اعاتب
والعتب ينساك ويساويلك
أبدي عتبي
لو إلَك كَبل العتب عذر ولف
كَبلك يغالي ، نومتي
لا الها مخدّه ولا شف .
جم ليطه من هذا الكَصب صابتك
واسلتها بصبر
دَمنَه اشكثر حنّه الشِلب
واشكثر داوينه اشكثر ؟
جم سكته فوكَ الموت
ولوبة جوع وتترجه النصر ؟
دكَ راسك
براس العرس
واشرب دمعتي بالدف
أيامي وايامك كّضن
بين المزبَّن واللف .
التمسك ، أبرد الصبح . أزركَ
امرصع بالشذر
التمسك ، بفي الضحى
أمسَلهم بنسمات الفجر
التمسك بجود النبع
بأميّته ، بحر الظهر
لا تجي شايك عذر
كَلفه يلسمر تعتذر .
عذرك يحزني من النحر
لا تجي ولا تتوسف
خلِّ الفراكَ بلا شمس
والدمع بالفي يمشف .
اش . لا توَعي المزنه
وتسودن حنيني بعذرك
آنه كَربت بور الفلا
وطشيت صبري وصيرك
وسكيت ، وضميت الشمس لليل
عود انتظرك
تاليها ريحان وملح
جا هذا كَدري وكَدرك ؟
عذرك ، يشكَ مرارتي
لا تجي وتتوسف
جذباتك تسل الخشب
يفلان وتشكَ الدف
نَعثِر كَذلتك
ودَلع زياكَك
بعد واتعَدل
ظلت انجيمه والصبح
كِلسه يتثاوب منجل
والسلف دخان اكَهوه
ودلة الصبح تتدلل
نامن بنات الناس
والشكَره بحنطتك
يَمَك تصهل
حط راسك بكَاع العرس
واشرب حنينك بالدف .
حنَّيت جفي
بلا عرس
للعتب عود أندهلك
ولضمت كَذلة مهرتك بدموعي
كلهم لَهلك
لا وين ، كَلي يا ترف
شميَّل الدنيا
وتميّل عِدلك ؟
دِكَ راسك ابكَاع الحبس
ما نوكَع أنحب الجف
أيام المزبّن كضن
تكَضن يا ايام اللف .
لا وين كَصدك
شايل بهَليّل
رَكد روجك
خذني أذل الدوله
لو لارادت تذل جروحك .
معتَّب . خلص بيّه الجرف
ما بيّه صبر دموعك
ولا بيّه ابجي كَبال باب العدو
واطفي شموعك .
دكَ راسك ابكَاع الحبس
ما نوكَع . انحب الجف .
أيام المزبّن كضن
تكَضن يا ايام اللف .
كتّي الدمع بالفرح
لا تبجين
كلفه جراحي
مصوّب واخفكَ عل الكَصب
والليط صار جناحي
كِلساع أطيحن
واهجس الذله
وأشبَّن صاحي
معتَّب يدهري
شكثر حسباتك
وروحي تناحي .
تانيني يا حنطة هلي
وزَيتي الزمر لا ينشف
ماطول بالريّه نفس
ما نوكَع , انحب الجف
يكَضن وارد يا ديرتي
لحسنج واموتن عل التبن
شوكَي الج ، شوكَ الكَطه التايه
وموعات الدهن
هَم آنه أضوكَ أميَتج
واركض بزخات المزن
دونج . يحز بلوزتي الخنجر
وأكابر . عيب أون .
تانيني يا ديرة هلي
وخلي الرصاص اعله الجف
أيام المزبّن كَضن
تكَضن يا ايام اللف .
رِد والكَصايب رسن لمهرك
ونومي الحالي
أركض كَبالك وانده الحلوات
رَد الغالي
رَد الغالي .
أحنه بنكَيصة ماي يا ناعور
وجرفك عالي
وفات الوكت
والليل حَط حزّه
بكتر دلاّلي
خنجر وجفية غُوه
وكل كَذله ريحانة طف
جني مشيت لدخلتي
ويدفعني رمشك لو رف .
حته الكَصب
شَي بعكَد
بوسه تشب
من بوسه
حسها شدهني
وخاف كَلبي
ولذت بالجاموسه
جا هاذي عملات العكَ
عمري ، واكَلك دوسه
موش انت صوجك يا شهم
دهرك وكَع ناموسه . | |
|
ABO ADM
المدير العام للمنتدى
الجنس :
المشاركات : 2184
| | موضوع: رد: تابع مختارات من الشعر العراقي 7 7/1/2010, 7:31 pm | |
| قوووووووة أبو مازن
مواضيع غاية في الروعة يسلمووووووووووووو يارب | |
|
