عريان السيد خلف000 حياته وبعض ماكتب

عريان السيد خلف

من { تل الورد }

ولد في محافظة الناصرية . قضاء قلعة سكر على ضفاف نهر الغرّاف . بدأ النشر مطلع الستينيات . صدرت له المجموعات الشعرية التالية :

* الكَمر والديره . طبع في بيروت والنجف .

* كَبل ليله . طبع في بغداد

* أوراق ومواسم .

* شفاعات الوجد . مجموعة مشتركة مع مظفر النواب وكاظم اسماعيل الكَاطع .

* صياد الهموم . مجموعة صدرت في لندن عام 1997 وتم ابدال عنوانها لتصدر ببغداد تحت عنوان { تل الورد } أكثر من مرة .

1 – بعد لتظن

بعد لَتظن

تحايلني المودة وليك روحي اتحن

وبعد لتظن

تكَاوي مشتتاتي

وبيك بس أصفن

وأبد لتظن

يضوكَ الدمع عيني

ويطفح المجمن

مالازم فرح

كون اليحب مذلول

وبشوفة عيونك عل يحبها اتمن

انا بروحي اليتم من لحظة الميلاد

وشيكلف اليتيم الحزن من يحزن ؟

سكَتني أول محبه

الكاس تلو الكاس

مر ، وتفننت أتفنن

وَنّت

ما قصرّت ، يا بخت هاي الروح

ابسكَاي المر . ترف مترهدن اترهدن

وأنه امباري ويه طولك خاف من لا خاف

تدفه بلهيبي

وآنه أطكَ سن بسن

ومذاير . حمامه وذيراها الباز

ومذيّر الباز . إبيا كتر يَمّن ؟

كفّت لا ملامة ، ولاضحج شمات

ولا كَال وكَلت ، وازماط وتمسكن

اهي كَطعة نفس لو رفسة المذبوح

والمذبوح

رفسه ومن بعد يسكن .

2 – الشاهد

بعد بيّه الصبر واجد 1

يشب بيدي المكابر . نار تلهم باث

يكَضيني الشرار وطبعي أضل بارد

أزم شفّه اعله شفه

وناب يخلف ناب

كل واحد شكل ، وصوابهن واحد

مكَالب ، والليالي تريد وَسعة بال

وهموم العَلَي ما مرّن ابواحد

كفاني اترفعت عن جلمة الياحيف

وسهمي اشمانكَض ، من هالوكت زايد

أكابر عالنزف

حدّ وشلة النتّاك

دامَنته وجزت . لا جَبِّر ولا شِد

كَبل مهره احلامي

تضل باثرها الخيل

هسه إشما اعسها . امحدّده اتحِدّدد

ومشاجج زماني وياي

عين ابعين

اتمهمز الكَومه ، وصاح بيّه إكَعد

حجّرني الصبر . لا سَمِح لا مغتاض

حالي لحالتي . لا وادِد . ولا ضِد

لا مَلكَه اليدب بالروح

دَفكَة روح

ولا عصرة حزن للراد عني إيصد

خلها إشما تصح . خنياب لو صيهود

طيّبت النفس .

لا طيّر . ولا سِد .

لا طيب الحليب

إيحرّك الوجدان

ولا صاحب وفي

العند الضنك ينشد

بس مجمع عجارب . ويل للغفلان

تتناوبه ابسمها وبالعجل تلبد

صحبة ليل كاس

وكهكهة غُمّان

محاببهم جذب ومزاحهم بارد

عمت عين الليالي

وهجم بيت الموت

يتخطى الرعيع وياخذ الماجد

دنيه ولاوَحَتني . املامح السرحان

غشّتني ابهداها وباكَت الواحد

وبعد بيّه الصبر واجد . اضل الهَلعصر شاهد

واصفهم بالقصايد واحد الواحد

واطشرهم وَلَمهم واحسب الف حساب

وَنّكَي الثوب الابيض من ردي الفاسد .

3 – اخذني وياك

جَمّلني بعد كَطره وخذني وياك

هناك . الفيض كَلبك

حتى روحي تنام

عصفورة جرف . بلل جنحها الكَيض

اخذني وياك

امشي بغير واهس

والطوار كَصار

وعيوني غُرُب . وجفوف إديّه اوداع

واسمي ابغير معنى

وميل كحلك غاب

ونمشدني اعله كَلبي

كَلبي حب وذاب

يا كَلبي حلكَ تنور ، لو سرداب ؟

صوَغني ، ولو من ليلكم نجمه

تِبات وياي

ومن تشبع سهر

ويجيسها الوهواس

اطفّيها ابصبح

والغبشه رشكَة ماي

واشعلني وَلع

يدّوي العطش بالعود

حتى انزع جلد روحي

وارد لصباي

أمّلني الفرح بسمَك . ورد عالباب

فاحَت ريحتَه ، ولّنّك بعد ماجاي

بعد ماجاي .

من يا صوت اصيحك

والصدى ايجاريك

واكَلك : مَكََدرت ، يالتكَدر ابليّاي .

4 – سابع بيت

1

لَمّيت المحابس ولضَمتها ابخيط عمري

وردت تدري ، وحيف ما حَسّيت

جَمّعت السوالف ، ولو خدّ او عين

جوّتني وحشتي ، وعالوهم ناديت :

ولك كَلبي توازه

وها كثر حَبّيت .

4 – سابع بيت

1

لَمّيت المحابس ولضَمتها ابخيط عمري

وردت تدري ، وحيف ما حَسّيت

جَمّعت السوالف ، ولو خدّ او عين

جوّتني وحشتي ، وعالوهم ناديت :

ولك كَلبي توازه

وها كثر حَبّيت .

2-
نزع جفّه اعله جَفّي

وعافني اويه الناس

مَطفي من الحزن ، حدّ زحمة الوهواس

ردت احجي

انطفه بطارف شفافي الصوت

كَتلك : هاك كَلبي . إلكَيت ظلك ناس

يا كَلبي الجدب

فاركَك طيب الطيب

وتعدّه العمر , وانكَطع نفس الياس

أوّحدك ذبل ليلك بالثلج والكاس

وحدك تنطفي

ويصعد عذابك زيت

وتخَّر عَتابه من الجدم للراس

وحدك

خيط شمعه

ولاحها النسيان

تتفتّت . رماد اوهام ، من تنجاس

تصعب

تنكسر . جف الصبر ميشوم طبعه

ولو لِنت . يالما لِنت . تنداس

وحدك . بيد وحدك

والوكت داسين

ليل يعكَب ليل

وداس ياكل داس .

3-
يا ناكَوط عمري ، ابيا هفه اتبدّيت ؟

يا كَلبي اعله هاي اشجاك ، وتوازيت ؟

شفتك عالبعد

وأوميتلك ملهوف

بجه لحالي الجرف ، من شافك توانيت

ذبّيت الحبل واستانست بالتيّه

نزع روحي الفرح ، ومن الفرح غنيت :

ولك كَلبي توازه

وها كثر حبّيت

فضحتني دمعتي

ولاخَذت وطّيت

يل كَلبكَ طفل

وك بس إلك حَنّيت

ونشدوني : تحبه ؟

وجذب كَلت : انسيت

لا شهكَة هلا ، ولا جرس يضوي الروح

لملمت العمر

وبكَلبي صفنة ميت

كَالوا : خاف تنسى وياخذك دولاب

سديت الكَلب

واشمرت مفتاحه اعله سابع بيت .

4 – مغرور

انا بليّاك . كَلبي اشما يدكَ يبرد

يا باب الفرح ، والحزن مَدّ الشوف

خايف لا يهب عالي الهوى وتنسد

يا اسود رمش

هنيال لون الليل

جي لنّه ويه عينك دوم , يتودد

فضلكَ عالحسن ، إنت آخر العنكَود

وبستان الورد لولاك ما وَرّد

يل زفّة عرسن ضحكتك تالي الليل

ويا عين الصَكَر ، بالزعل من تحتد

يالتدَلَع غَنَج

واليحب مو كَصّاي

وإنت عله الجتل ، مبخوت تتكَصد

يا صوغة هدايا

وفضفضاك الليل

لا تلتم بديّه ، ولا هِدي وتنشد

عوّدني اعله بُعدك

وانته ابو الطيبات

بلجي اعله الصبر . يمعود اتعوَد .

كَالولك حلو وخَلّوك بيّه اتجور

والكَلَك ، إشوَصَف بيك ، واشعدّد ؟

أشو لا مو حلو ، وما تشبه الغزلان

ولا ريح الكَرنفل بيك لو وَرّد

ولا عينك مسافه ، وبَسمتك سلوان

ولا كل اليشوفك تمر ، يتحدد

ولا الله ابتلاني وخالط الجيلين

ولا عمري اعله شربة ماي يتفرهد

ولا تزهي بشبابك . ماخذك طغيان

ولا انت العزيز ، إلبيك بس اركَد

ولا صوتك شعر

وحجاياتك ناكَوط

وبشفافك نضاره الماحواها أحد

ولا غاوي ولذيذ

وتشبه النعناع

طيبه ، وطيبتك كل يوم تتجدّد

ولا طولك مصيبه ، ومثل كل الناس

حسنك مو قبى ، وخدك مثل كل خد

يا أسهل من اسمي

وصعب حدّ الغيض

وطلاسم لو ردت ويّاي تتشدّد

صدكَني ، احبك حب غريب الطور

واحب صبرك عليّه وما كَلت لَحّد

5 – تل الورد

عاتبني ابعتابك خل ترد روحي

أوَهّسني ابدلالك ، يا شتل شمّام

حتى ازهكَ ، وَشوفَك وينها اجروحي

بيّه اشبع غرورك

يا أعز جتّال

يتمايل غَنج لو بيّه ، ثُكَل نوحي

تعاتبني اعله حالك

صار بيك الصار

جا شِدِّل اجروحك هاي وشتوحي

كَبل حبك ، جبل مالاح طرفي السيل

هَسّه أول زخاخ

إيغطّن سفوحي

ومنّك ماروت يَدعَج بعد روحي

ولارادت ولا سمعت ولا حَبّت

ولا تحمل { نجاة } ابليل لو غَنّت

اعلمها الورع واطبكَ عليها الباب

تذكر ضحكتك ، واجهرت ما عَنّت

لا لامتك ليش ، وشوفك اصبح طيف

شلون ابعدت عنها

شلون ما جَنّت

وعيونك ابغير عيونها اتهَنّت

وجفوفك ابغير جروحها اتحَنّت

يا تل الورد . تل آخر السبّاح

حته اطفه من اشوف رويحتي انتَلّت .

كَلت انجفه الماي

وذبل عود الياس

والوادم نست

وبغيرنه اتسلّت

وأول ماشفت طولك نسيت الصوت

وروحي بلا سبب بجفوفك افتَلَت

يا كَمرة حياتي البَعد ماهَلّت

يا أنتَ ، وكفاني اتوهدنت ويّاك

تحسبني وحسبتي وياك ما فلّت

كلمن عرف وشره ، وشال منها الشال

وتعدّه العمر والوادم اندَلّت

هسه الراح راح ، وبين ايديك الروح

بس ذمّه ابركَبتك يوم لو سَلّت .

6 – صيّاد الهموم

ضمني بليل ثاني ، وحل حلال الخِل

شحيحه افراحنه ودكانهه امعزّل

البسمه انبوكَهه من الآه والياويل

وصيذاد الهموم ابدفتره ايسجّل

يَكَلبي اشبعد ، ومعكرات الكيف

زمّن توزهن . ما أظن بعد تحمل

يولنّك ضواري امهذبات الناب

لا مَخلص يعينك لو ردت تجفل

يمشاجج زمانك ، حدَ كَِطاع النيط

تترجه الشفا

وشكواك سِل السِل

لا عاد الصبر يلجم مصب العين

ولا مثل الخَلكَ بدموعنه انمثل

ولا ذيج المضايف عاجده الديوان

ولا سِربة وِذن برباضهن تصهل

ولا شارب يرف لو مطكَت أم عريف

ولا شكَرة جِعد بوجوهنا اتهلهل

ولا مدرع فشكَ

ينحر صدور الخيل

وما بين اللميض ايحوّل اتحوّل

ولا صاحب ذَرِب ويوجّد الماذيك

يبسط خاطره

وفوكَ الجرح ينزل

مصخت . والضماير غبّراهه الغيض

وامتد الدرب ، وأم الفرح مِثجل

وطالت

والعمر كلما تِلِف بيه طَوّل

غَم ذاك العمر

من ينكَضي اتعِلعِل

شي عاشت لفو ، وتروم هذا وذاك

وشي كَضت عمرها

ابنعم وتوسّل

وشي حربة مواسم . تنبت ابكل كيف

اشما بَدّل وكتها اتبدّل

وشي تلهث عمر تجمع ورق وارقام

لحدّ كَطع النفس

وبمالها اتنعثل

امناحر والخلكَ ما تعرف المعروف

ماخذها الطمع ، وبلا سبب تكتل

ماني من ارد اسولف واكشف المغلوكَ

يغدي الحَكَ صبر وحجايتي اتزعّل

يل شَعرَك امليّل . حل حلال الخِل

وطوِّل واهسك للواهسه امخيّل

اسلم من عذاب الآه والياويل

وعلّلني بهواك العافيه اتعلّل

كل بوسة غفو ، اتطرّز حياتي انجوم

وكل شَمّة نحر . جَبرة خليل الخل

يا تالي المزن . جل العمر عيسوب

وفوكَ امروز روحي . الزور صاير جل

مِدنِف فوكَ وكري ، ابطارف الصعبات

وصكَور الروابي العاليه أتزّبل

مشكلتي الفرح ، ما عَرِف بابه امنين

وبلون الحزن من زغر متمشكل

ناورني الدمع بأول مدب عالكَاع

وناغمني الحزن وَي رنّة الجنجل

ضَمّت الصداكَه لساعة الكلفات

واحرزت الذخر ، لَن جودها اموشّل

حِل شَعرَك حبيبي . الليل بلجي ايطوّل

لا خيط الفجر يستعجل من ايهل .

لك يسلمو هالديات ياااااااااااااحق وبصراحة هالشاعر إلو إحساس خاص فيه وأكتر شي بحبو هو "ضمني بليل ثاني" شي كتير راقي
وعنجد كلماتو غير وشعورو غير ...
يعطيك العافية أبو مازن وبالتوفيق

صرنا 2 ابو وسام
وربي من افضل الشعراء بالنسبة الي
وبحترمو كتير لذوقو وكلامو الراقي
مشكور ابو مازن
معلومات ممتازة