نبذة عن الشاعر رياض النعماني

رياض النعماني

من { إمام الورد }

من مواليد محافظة واسط ( الكوت ) قضاء النعمانية . . أعظم الشعراء الكسالى في نشر شعره . قبل سنوات كان احد أصحاب دور النشر في دمشق يلح عليه من اجل اصدار نشر مجموعته الثانية . طبعتها في الكومبيوتر وسلمتها له في قرص ومطبوعة على الورق لكنه أهملها ولم ينشرها . لديه الكثير من المجموعات الرائعة تنام في حقيبته . عرف الشاعر رياض النعماني حياة المنافي وقساوتها منذ عام 1979 ، فلقد توزعته بين بيروت ودمشق ومدن أخرى حتى استقر في الدانمارك منذ بداية التسعينيات . يعد الشاعر رياض النعماني أحد الشعراء الذين ظهروا على الساحة العراقية الغنائية على يد الملحن العراقي كوكب حمزة عندما لحن له قصيدة ( غنت احميمة ) والتي غناها سعدون جابر ، كان ذلك في الربع الأول من العقد السبعيني القرن المنصرم ، توالت بعد ذلك الكثير من الأعمال بين الشاعر رياض النعماني وأستاذه الملحن . المعروف عن رياض النعماني ، إنه شاعر محب للنقد ، لأنه يعتبر أن النقد هو الدافع المهم لتطوير موهبة الشاعر ، لذا نجده وفي كثير الأحيان يعرض قصائده على أصدقائه من الشعراء والكتاب والفنانين قبل أن يعمد على نشرها .

1 – ممنوع

لكَيتك تكتب بروحي عذابات العمر

شوكَكَ نبت بالكَلب

ويَّه اللعب والزغر

وأمي الكسرها الوكت

بأول وكتها وغدر

فوالها كَلها :

هذا الطفل ينكتل

ومحّد يوكَف له ويندعي بيه

ويحب لحدّ الموت سمره

أولا درت بي

إمعذب نشيد المدرسه إشبيه

لا آنه حفظته ونِمت

ولا كَلبي ناسي .

ترسني خوف وبجي

بكل دفتر ألكَيه

ذبحوني بالمدرسة والعلم مرفوع

دمي اختلط بالنشيد

وصاح ممنوع

هيجي طفل ينذبح

والعلم مرفوع

***

وأول درس بالرسم

كَال المعلم :

إنتَ ، أبو ثياب العَتيكَه ارسم

رسمت طيور بيض ، وكوخ متهدم

خزرني ، وكَال : تمسحهن

رسم الطيور البيض ممنوع

كَال : إكتبلنه شعر

كَتله : أحب شعبي

كَال : الشعر ع الشعب والعشكَ ممنوع

كَال : اقرى كلشي التحب

كَتله : شعر شعبي

كَال : اقرى كلشي ولا تقرى شعر شعبي

هذا يعلم الحزن والثوره والجوع

والثوره ممنوع

ممنوع .

ممنوع من السفر كتبوا على البوب

ممنوع من السفر

بي ريحة الحنطه والهور والبارود

واكواخ الجنوب .

هذا يساري إمبين من الدم

ولون عينه والثوب

هذا إلنه ثارات أويه أهله

ونار وحروب

علموا علينه البدو إتثور

كَوّموا علينه الفلح ، والهور

كَلبوها

فد كَلبه علينه ، وكَامت إتفور

ممنوع من السفر كتبوا على البوب .

يوميه بولايه وبريد

إبلا طابع

صرنه مكتوب

وَسفه العمر

من تالي مكتوب

شِفت الحزن ع الرحلة مكتوب

بين الدفاتر ضوه

وموعد ومكتوب

إوّ ورده ابنداها

وشعر بي ريحة الثوب

كل القريته بخوف محبوب

اسمك بنص الكَلب

يا كَلبي مكتوب .

ذبحوني بالمدرسه

وكَالولي ممنوع

تكتب بنص الكَلب

والعَلم مرفوع

ممنوع ممنوع ممنوع

بيج الفرح يبلادي

ممنوع ممنوع بيج الفرح

والحزن ممنوع

ويجذب الكَال العمر يحلى

بلا دموع .

2 – ناهي الراعي

حبيبي ، شِفت الشمس طفله ، وغفت بجفوفه

يلعب بترجيتها

وسواراتها البيض بهّده

ويحجيلها سالوفه

جانت فرد فلاحه

طيبه ، وفقيره وتحب ناهي الراعي

ولمّن درى الاكَطاعي

حطّها وذبحها الظالم

ومن يومها ناهي مُرَض . مو سالم

وفد يوم مات الطيب

من حسرته ومن خوفه

ومن عُكَب هذا بسنين

الراعي والفلاحه المساكين

بليله ربيعيه . تلاكَوا بالسمه نجمتين

ومن رادوا إيعرسون

راد النجم بيده إيزفهم

كَالوله لا

نرجه لَهلنه والفلح هيَّ التزفنه

وصدكَ ردّوا ، وطلعت الوادم تزفهم بالمساحي

ومرّت الزَفّه على الجتّال الاكَطاعي

تصكك

مات من خوفه .

***

وشفت بيناتهم يركض حبيبي

والشمس بيده خبز للناس

وين اللي يجيب الفرح بالجيلات

ويحيي الناس ؟

ماتت من حزنها الناس .

وينك ؟ ما تجي .

الوهواس خَضّر بالكَلب ليل وتراجي

وياس

بَس أنت حبيبي

وبس إلك أبقه

اشتريد إتكَول ذيج الناس

كَضه

مات

انتحر

وانداس .

جذّابين

بس أنتَ تظل

وانتَ تخلص الناس

بَس انتَ حبيبي

الشفه تركض ، والشمس بيده . عُبر نهران

ليله ، إتحزمه طيوفه

وعلى جتوفه

شفت برنو تهلهل ، فوكَ لجتوفه

وكَلت : هنيالها أمه إتشوفه

كل صبح

كَبل الناس

كَبلي إتشوفه

وتحجيله عن عمر الزغر

وسوالفه الحلوه

التضّحك . رتلة إلسانه :

أرغيد إبنيه كون محجله

وطويغنيه

وتفكَه حلوه

وبلبله

فدوه أروحن لُمّه

ولرتلة إلسانه ، وجنجله

فدوه أروحن لُمّه

واتمنيت روحي سنبله

يحصدني

واحضن منجله

وبالجسمه أصيرن حصته

والعب

واشم بصايته

وانسه التعب بجفوفه

وحبيبي ، طفله الشمس

طفله وغفت بجفوفه .

بغداد أواخر 1974

3 – قصيدة

بستان طِيب ، وورد

يكَعد إبفي النهد

نور الحسن ، نوّرَه

سبحان من كوَّره

وانطاه ريحة سِعد

يا ربي

هذا نهد

لو رب توّه أنولد ؟

دمشق 1986

4 – بستان الكلام

سكران

وخذاني السكر

ما أشوف الدرب . ما أشوف

أميل ، وأرد أطيح

وعطر يسندني

وألف اسم الجلاله

ونظرة خشوف .

أهيم

وجوّه شعري ، إتضوّي من نور المحبه

إتلَث ثريات

وعَناكَيد النجم بثيابي

جدّامي

و وراي

وكَلبي مخطوف

خطفني الما تشوفه العين

أولا يشوف

بكل شوفه أشوفه

وهوَّ ما يشوف

جارحني بحلاته

ومدري بيمَن ركَبه السوَّاه

بيش ؟

بيا عسل

يا تين

يا بربن ، وخستاوي

ورطب مديوف

شاريني بنقاط { الشين }

والشهكَه

وشكَوكَ الضوه

وشوفات النحر من يفلع إبجمَّار

وبجوري

وجمال ، بحسرته

ظلت بعيني طيوف

أشوفه أشلون ما يندار

جَن روحه ضوه

وجَنَّه الضوه ، وما يحجب المكشوف

يا ربي دخيلك

احجب المكشوف

لانعمه ويضيع الشوف

سولَفلي سوالف ما عرفت الغازها

لكن حدايق فتّحت بروحي . العطر بيها

الورد ، والناس والريحان ، وطيور السمه

ونور العرش ، والخضر والحلاّج

وآيات الحسن كلها عليَّ ضيوف

قراني بعطر قداحه

ومحاني إبحسِن تفاحه

وبدى بيَّ الكتابه

أنتَ أقرب إلي من { واو } الوصل و { اللام } يابه

من أشوفك

روحي فوكَ الماي تمشي

وبالهوى إتطير

وعلى النيران تركَص

واغدي بلابل

وأنتَ غابه

جِنبُذ إيفتَّح

يصير الكون غابه

برعم إيفتّح ، وأصيرن

كلي غابه .

***

سولَفت للدرب عَنك

سِكَر

صرنا اثنينه نمشي ، ونرد ليوره من شدّة السكر

وندور

صار الليل يخلص

وإحنه

لِسَّانه نِرد ، وندور

صار النجم يتمرجح مصابيح

ومشينه

واحنه نتمرجح مراجيح

الدرب ، وآنه مراجيح ، وحيارى

من يدليني إعلى بيتك

وآنه والدرب اليوصلني سكارى .

من أطيح

الدرب يسندني

وأسنده من يطيح

ورحنه نتطوح

وصار الليل تطويح

لكَينه كَبالنه فانوس ، وحده يهيم

ويه الريح

حبيبي لا تروح إبعيد . تجرحني

التباريح

حبيبي ، من تروح إبعيد

كلشي إيهب عليّ ريح

حبيبي ، لو تروح إبعيد

ينكرني ضواي ، وزيتي

وايامي ونين إيعن عليّ ويصيح

حبيبي ، رِدَ إليّ من الليل

ضميت الخمر والعيد ، وبحنّة فرح خضره رسمت اهلال ، وانطر

كل وكت جيتَك تجي إتهلَّي

ارتعش مره وطفه

وكَلبي ارتعش مرات

كَتله إشبيك

كَال

اليبتعد عنّه حبيه ينطفي مثلي .

5 – صبح جنوبي

أرسمَك جوري وتغيب

وبرتقال النوم بالنهدين يتفاوح

وغيم إيطير

غيم إينث على سواجي الكَرنفل نَعَس وردي

ومدري شنهي إويا

إلَه طعم الزبيب .

إتحسّّر الجُمَّار

من سولفت عنّك

وجرحِتَه لَذه

وكَضه ليله نحيب

كَلي . جم بستان تين ، وجم ألف عصفور

يتزاققن بيك

حتى هاكَد لام لذَّات ، وحليب ؟

فوكَي ، شَعرك مهر ياقوت

وصهيله إيهز عليّ تكّي الدهر كله

وحَمار التكّي وأوصافه وحلاته

بجسمي تسري

ويسري بعظامي المرض وأفرح

مرض محبوب أو لا طب الطبيب .

شَعرك الأعراس

وليالي الكَدر ، والمحيه ، وايام النذر ، وماي الورد

وروايح الحضرات وشبابيجهه وضيهه ، وهلاهل ليله

وصبحية السبعه ، وشمسه التنزل إمحنّايه للطرمه ، وفرحه ، وزفّه

إشناشيلهه وفيهه ، وهلاهل زفّة القاسم ، وآنه إملبس

حبيبي إمنين أجيب ؟

أرسمك واسمع بصابيعي بجي وغيم

وغرانيكَ وغناني وصبح شايل بيده ، فانوس الفرح

ويدلِّي المشاحيف للبصره

و ورى إمشاحيفهم ريحة حليب

وطابكَ ودَلوَه

تِصَحّي الهور من كل وجع ، وتكَوم الشمس

بين إليِزِر بمعاضد وخزّامه ، وبشذرَه

وفرح لعب التراجي والكَلايد والمحابس

والحجول الناهبه الكَمره

وإنتَ ، نجمة صبح خضره

وإنتَ ، كَطرة الماي الشارده

من النحر

للنهدين للصرّه .

1 / 1989

6 – هو .. هو

كَبل متغيب الشمس

والمشمشه إتلم البلابل للمنام

وتنثر السندس على عش العصافير

وتِرشّه بهيل

وإتطيره بغمام

كَبل متغيب الشمس

وانتَ تساكَيني

وتسامرني وتنادمني

وخلص كل المدام .

ضَوَّكَتني ، إشكثر لم اللوز

بشفافك عَسل

والبرحي بيها إشكثر هام

ومن مِلِت من سكري

تعبان أرد انام

كَثَّرت لومك عليَّ

وهوَ التِسكرَه بعد يعرف ملام

إيطلكَ الدنيا وأهلها

ويسكن البستان

منذور لجمالك . وبعد لا يعرف صحو

ويعرف منام

يمشي ، ما يدري عليمن رايح

وليوين
حافي ومنطفي ، لكن ملك

والمملكة اللذات ، والنشوه الأميره

إمتَوَّج

وتاجه رذاذ البحر والسكره الجبيره

إيحَسِّب النسمه جزيره

إينامن الكاسات ع النجمه الأخيره

وهو صاحي ،
ايلملمهن ندى وجوري وياسمين

إيمَسِّح النوم العليهن بالحنين

عيني لتنامن بكاسات العمر

ما ظل عمر

واحنه حزانى

وربنا سوّه الخمر للعشاكَ ، والكَلبه حزين

جم عمر ، وآنه حزين

جم عمر

وآنه وحيد

جم شته ، وإنتَ بعيد

وأنتَ ليلة شام

وخدودك مناره

إنتَ ليلة ذهب

وآنه الحزن توّجنِي على التيجان سلطان

الخساره

ومشي ما مهتم ملك

وأيامي غنوه

لا تلوم المبتلي بالحِسن

بَلوَه

زيِد سُكر

إتزيد صحوه

إتّسأله منو إنتَ

يجاوب :

آنه هو

البحر هو

النقطه هو

والورى النقطه

إشكثر آيات واكوان و ورد ممسوح بانوار وكتابه

والغياب الممتلي أجراس وكتابه

وهو ,

هو

22 / 9 / 1987 دمشق

7 – أمام الورد

بَيَّتت شَدَّة ياس

معكَوده بسبع بوسات

وَي شباج إمام الورد ، والحضره هلاهل

والصحن رايات وبخور وضوه ، وادعيات وصواني نذور

وازنود جمَّار إو ورى كحل العبي امرايات زَفّه

إو واهليه بكل كتر للنالو امراد ، وإجو برداس

وجفافيهم البيضه حمام إيطير

وايطير الملبس

والحمام يطير

ودموع الفرح ترسم على إحجوله جناجل

والحرير الشام .

نام النعاس الحلو

وبَرَّد الحضره

والخُضره النديَّه

واشتهى المصقول كون ايموت

لوزه . إشتهت ليله من البلابل

وآنه . ألم من ريكَ تين آخر الصيف

إسنين ألم

وسنين أكَطرَه

إويه الورد والهيل

وروايح فجر شمَّام

وبهوسات أجي من أول الشارع

تلاكَيني المناير

والكَبب بهلالهه العالي وذهبه

ونَشرَت إضواياتهه

وأكَعد وأنيّم الياس بعبيره الندي سبع أيام

احوطهه بقرايين ، وصواني شموع

بلكي تنام

وأحسِّب للخميس اليجي

وأنتظر وأظل محتام

يا ساعه تغيب الشمس

وإنتَ إتهل

مشاعل ضوه إتدِكَ بابي

وأخاف من الحِسن

واجفل

إو وراك إيزفك البستان وايهلهل

إو وراك الفرح بمواكب ترف اعلام

وأكَِل للعصر

بيده إيجيبك العتبة غرفتي

إو واكَف آنه اكَبال المرايات

أشيلن بيدي شَدَّة الياس

ومن تكَبل

أرشك بيهه إمن إبعيد

وأبوس إمنين ما بَلِلَك ريكَ التين

ومَي الورد ، والشمّام

وأفرفح بالبجي من الفرح يَحبيّب

وأظل ما نام

أظل أيام ساهر

وانتَ ريحانه بسريري إتنام

مشكور عالموضوع الجميل ياغالي
نقل رائع

يعطيك العافية حبيبي أبو مازن عالمعلومات والأشعار الجميلة
تحياااااااتي لك ..

عضو مؤسس vip الجنس : المشاركات : 378

أبداع غير موجود وين هل المشاركات من زمان